«Spartak» bosh direktori Shamil Gazizov mojarolarga sabab bo‘lgan «Sochi»ga qarshi o‘yinni (2:2) boshqargan referi Kazarsev va VARda ishlagan Yeskovni umrbod hakamlikdan chetlatishni taklif qildi.

Eslatib o‘tamiz, kecha bo‘lib o‘tgan uchrashuvda hakam moskvaliklar darvozasiga 2ta shubhali penalti belgilagan bo‘lsa, videoyordamchi hakam uning xatosini to‘g‘rilamadi.

«Birinchi vaziyat — bu penalti emas. Nima uchun VAR vaziyatga aralashmadi? Nima uchun hakamning o‘zi videotakrorni tomosha qilish uchun bormadi? Ularning har ikkisi vaziyatni penalti deb hisobladimi? O‘zimni xotirjam tutishga intilyapman, ammo ichki hissiyotlar tinchlik bermayapti. Avvalo hakamlar bizga qanday holatda penalti belgilanishiyu, qachon belgilanmasligini tushuntirib bersin. Agar har bir turdan keyin hakamlarning qarorlarini muhokama qiladigan ko‘rsatuv tashkil etilsa, bu dasturning reytingi yuqori bo‘ladi.

Ikkinchi vaziyat borasida esa boshqa klublardagi hamkasblarim ham hayron bo‘lishmoqda. Bu maynavozchilik. Bu holat penalti ekanini ta’kidlagan birorta insonni ko‘rmadim. Hakamlik saviyasi shunchalar tushib ketdiki, ko‘zlarimizga ishonmayapmiz. Keling, futbolga ishonamiz.

Kazarsev va Yeskov hakamlik faoliyatida ishlashdan mahrum etilishi kerak. Iloji bo‘lsa — umrbod», — dedi Gazizov.