Таркибида Месси бўлган жамоани, қандай муаммолар гирдобида қолмасин, ҳатто ўша муаммоларнинг сабабчиси Мессининг ўзи бўлган тақдирда ҳам — бирор рақибга қарши "аниқ ютқазади" деб тахмин қилиб бўлмайди. Ҳатто ўша рақиб "Бавария" бўлса ҳам.

Месси худди "Наполи" билан ёки "Ливерпуль" билан ўтган йили "Камп Ноу"да, ёки шу "Бавария" билан бир неча йил олдин бўлганидек, бир нечта эпизодни ўз фойдасига ҳал қилиши мумкин. Уёғига "Барселона" эплайди.

"Бавария"нинг бугунги мувозанатли таркиби, прессинги, тўп назорат қилиши, бир қатор иқтидорли ёшлари, тўпурар Левандовскиси, ажойиб кайфияти, бир неча йиллик орзусига қарши бугунги "Барселона" фақат бир факторни қўя олади - Мессини. Бошқа жабҳаларда каталонияликлар кучсиз. Фақатгина Месси ўзининг энг юқори даражасини намойиш қилсагина, менимча, "Барселона"да имконият пайдо бўлади.

Албатта, бир ўйинчи бир жамоа ўйинини тубдан яхшилай олмайди. Аммо ўша ўйинчи жамоанинг ғалаба учун имкониятларини бир неча баробар ошира олади.

Демак, бугунги чорак финал ўйинида ким яхшироқ ўйнаши, ким кўпроқ ҳужум қилиб, вазият яратиши аниқ — "Бавария".

Аммо ким ютиши маълум эмас.

Қаҳрамон Асланов.