"Манчестер Юнайтед" бош мураббийи Оле-Гуннар Сульшер Европа лигасининг ярим финал босқичидан ўрин олган "Севилья"га қарши учрашувда қандай режа асосида ўйнамоқчи эканини айтиб ўтди.

"Ҳар қандай учрашувда омадли дебют муҳим аҳамиятга эга. Агар ёмон бошласанг, биринчи тўпни ўзингга бўйсундира олмасанг, подкатни муваффақиятсиз ташласанг, кейин яхшигина тер тўкишга тўғри келади.

Бизнинг режамиз шундай: "Севилья"га нисбатан кўпроқ гол уриш! Энг яхши ўйинимизни намойиш этишимиз, рақибнинг прессингидан чиқиб кетишни билишимиз, ақл билан ўйнашимиз, муҳим паллаларда ижодкор ва эҳтиёткор бўлишимиз керак.

Бундай тўқнашувда ўйин тақдирини биргина жарима зарбаси ёки индивидуал маҳорат ҳал қилиши мумкин", — деди норвегиялик мутахассис.

Эслатиб ўтамиз, "Севилья" - "Манчестер Юнайтед" ўйини 16 август, якшанба куни бўлиб ўтади.