Тажрибали мутахассис Нўъмон Ҳасанов Навбаҳор”нинг Андрей Канчельскис бошчилигидаги мураббийлар штабида иш бошлади.

Мазкур мутахассис 1971 йилнинг 10 февралида Қўқонда туғилган.

Ярим ҳимоя чизиғида ўйнаган. Футболчилик фаолияти давомида “Автомобилист” (Қўқон, 1989 – 1990 йиллар), “Пахтакор” (Тошкент, 1990-1994 йиллар), МҲСК (Тошкент, 1995-1997 йиллар), “Рубин” (Қозон, Россия, 1998 йил), “Дўстлик” (Тошкент вилояти, 1999-2000, 2002-2003  йиллар), “Насаф” (Қарши, 2001-2002 йиллар), “Қўқон-1912” (2003 йил), “Трактор” (Тошкент, 2004-2005, 2007 йиллар), “Шўртан” (Ғузор, 2006  йил), “Сўғдиёна” (Жиззах, 2008 йил ) ва “Локомотив” (Тошкент, 2009 йил) жамоаларида тўп сурган.

Футболчилик фаолиятида “Пахтакор” (1992 йил), МҲСК (1997 йил) ва “Дўстлик” (1999-2000 йиллар) клублари сафида Ўзбекистон чемпиони унвонига сазовор бўлган.

Шунингдек, “Пахтакор” (1993) ҳамда “Дўстлик” (2000) жамоалари таркибида Ўзбекистон кубоги соҳибига айланган.

Бундан ташқари, 20 йиллик футболчилик фаолияти давомида рақиблар дарвозасига 125та гол уриб, Геннадий Красницкий клуби аъзосига айланган.

1992-1997 йиллар давомида Ўзбекистон миллий терма жамоаси таркибида 23та ўйинда майдонга тушиб, 4та гол урган.

Нўъмон Ҳасанов мураббийлик фаолиятини 2002 йили Тошкент вилоятининг “Дўстлик” жамоасида ўйновчи-мураббий сифатида бошлаб, ушбу клубни 2002-2003 йилларда бошқарган.

Сўнгра, “Пахтакор - 2” (Тошкент, 2012 йил), “Пахтакор” ўринбосарлар жамоаси (2013 йил), “Навбаҳор” (Наманган, 2013 йил), “Пахтакор” (Тошкент, 2015-2016 йиллар), “Қўқон -1912” (Қўқон, 2016-2019 йиллар) жамоаларида бош мураббий сифатида иш олиб борган.

Шунингдек, 2014 йилда “Пахтакор” мураббийлар штабида фаолият юритган.   

“Навбаҳор” ПФК матбуот хизмати.