«Манчестер Юнайтед» сардори Харри Магуайр Греция полицияси билан можарога боргани учун қамоқ жазосидан қутулиб қолиши мумкин. "The Sun" тарқатган хабарга кўра, футболчи йирик миқдорда жарима тўлашига тўғри келади.

Эслатиб ўтамиз, Англия терма жамоаси ҳимоячиси Грециянинг Миконов оролида дам олаётган пайтда ҳибсга олинган эди. Футболчи аввалига инглиз туристлари билан "сан-ман"га борган, кейин эса воқеа жойига етиб келган полиция ходимларига қаршилик кўрсатиб, уларни ҳақоратлаган. Бундан ташқари, ОАВга кўра, Магуайр қоидабузарлик учун жаримани жойида тўламоқчи бўлган, лекин унинг хатти-ҳаракати пора бериш сифатида баҳоланган.

Британия матбуоти тарқатган хабарга кўра, 27 ёшли футболчи таътил пайтида доимо "ичган". 23 август куни Магуайр Грециядаги суд биносига ташриф буюрган ва ўзига нисбатан қўйилаётган айбловларни рад қилган. 25 август куни яна бир суд бўлиб ўтади. Лекин унда футболчининг манфаатини унинг адвокати ҳимоя қилади. Харри эса Англияга қайтади.

Спортчини қамоқ жазоси кутаётган бўлиши мумкин. Адвокатнинг "Sunday Mirror"га маълум қилишича, мазкур қоидабузарлик учун максимал муддат 7,5 йилни ташкил этиши мумкин. Лекин бу ерда гап 3 йиллик қамоқ жазоси ҳақида кетмоқда.

Греция қонунларига кўра, 3 йилгача бўлган ҳар қандай қамоқ жазосини жаримага алмаштириш мумкин. Жарима миқдорини эса суд белгилайди. Бир кунлик жарима миқдори 5 евродан 100 еврогача етиши мумкин. Назарий жиҳатдан Магуайр 3 йиллик жазо учун тахминан 90-100 минг евро тўлаб, қамоқдан қутулиб қолиши мумкин.

Эслатиб ўтамиз, футболчининг ҳафталик маоши 190 фунт стерлингга тенг.