Бугун бўлиб ўтадиган “Пахтакор” — “Локомотив” ўйинига “Локомотив” стадиони мезбонлик қилади. Мазкур масала Coca Cola Суперлига бош мураббийлари иштирокидаги йиғилишда кўтарилган бўлиб, бир овоздан маъқулланган.

ЎФА биносида бўлиб ўтган йиғилишда ЎФА бош котиби, Фахрийлар кенгаши вакили, Терма жамоалар маркази мутахассислари, “Сўғдиёна”, “Қўқон-1912”, “Қизилқум”, “Пахтакор”, “Локомотив”, “Бунёдкор”, “Бухоро”, “Сурхон” клублари бош мураббийлари, шунингдек, қолган клублар вакиллари иштирок этганди. Унда октябрь ва ноябрь ойидаги ФИФА кунларини тўлиғича миллий терма жамоага бериш, мураббийлар кенгаши аъзоларини сайлаш каби масалалар қаторида, “Пахтакор” — “Локомотив” учрашувини ТТЗ даҳасида жойлашган стадионга кўчириш масаласи кўриб чиқилганди. Йиғилиш иштирокчилари бу масалага қарши эмасликларини маълум қилганларидан сўнг, ЎзПФЛ мазкур топшириқ ижросини таъминлаш мажбуриятини олганди.

Учрашув аввалдан белгилаб қўйилганидек 18:30 да старт олади.