Кеча УЕФА ёшлар чемпионлар лигаси ғолиблари ҳақида ёзгандим. Энди финалчиларга тўхталмасам бўлмайди. "Бенфика" шубҳасиз ўйин бўйича ютқазди. Аммо бу мағлубиятнинг драмаси бор ва у анча йиллар аввалга тақалади.
1961 ва 1962 йилларда Бела Гуттман бошчилигида "Бенфика" клуби Европа чемпионлар кубогида (ҳозирги чемпионлар лигаси) ғолиб бўлган. Ўша иккинчи чемпионликдан сўнг клуб Гуттманга ваъда қилинган маошни тўламай норози қилган. Мураббий эса аламдан мана бу қарғишни айтиб кетган: - “Бенфика" менсиз 100 йил давомида бирорта еврокубокни юта олмайди”. Аввал бунга ҳеч ким эътибор бермади. Аммо йиллар ўтиб клуб бирин-кетин финалларни ютқазиб келди. Бугунгача Бенфика 8 бор финалларга чиқиб, барчасида ютқазди. Мутлоқ рекорд.
Ана энди ёшлар чемпионлар лигаси ҳақида. Турнир 2014 йилда ташкил этилди ва 7 йил ичида "Бенфика" 3 марта финалга чиқди. Бунга ишониш қийин, лекин лиссабонликлар барча финалларни бой беришди. Гуттман анча нафаси ўткир экан, ёшлар жамоасига ҳам урибти, деб ўйлайди кўпчилик. Агар бунинг қандайдир алоқаси бўлса, унда Бенфика клуби 2062 йилдагина ушбу қарғишдан қутилади.
Қиссадан ҳисса шуки, бировнинг ҳаққини ейиш ва норози қилиш доимо оғир оқибатларга олиб келади.