2020 йилги футбол мавсуми АГМК учун азалий рақиб саналган Бекободнинг "Металлург" жамоасига қарши ўйин орқали бошланганди. Мавсумнинг қоқ ярми ўтди ва жамоа иккинчи давра старти арафасида.

Суперлиганинг 14-турида турида АГМК Бекободда «Металлург» меҳмонига айланади.
Бу тўқнашув жамоаларнинг чемпионат доирасидаги ўзаро 26-беллашуви бўлади. Тошкент вилояти дербисида АГМК ва "Металлург" чемпионат доирасида 25 маротаба тўқнаш келган. Ўтказилган учрашувларда 11 ғалаба АГМК ҳисобига, 11 ютуқ "Металлург" номига ёзилган. Қолган 3 беллашувда эса ғолиб номи аниқланмаган. Тўплар нисбати 47-46, жамоамиз фойдасига.

Умумий ҳисоб-китобга кўра, АГМК ва "Металлург" барча мусобақаларда жами 29 маротаба тўқнаш келган ва унда АГМК 12 ғалаба, "Металлург" 13 ғалаба ва қолган 4 беллашувда дуранг натижаси қайд этилган.

Суперлиганинг 14-тури доирасидаги АГМКнинг эҳтимолий ғалабаси жамоамизга ушбу қарама-қаршиликнинг чемпионат тарихидаги кўрсаткичини яхшилайди ва ғалабалар сони бўйича "Металлург"дан ўзиб кетиш имкониятини беради. Шунингдек, эҳтимолий ғалаба барча мусобақалардаги умумий кўрсаткич бўйича ҳисоб-китобни тенглаштиради.

Айни пайтда жамоамиз мусобақа жадвалида 29 очко билан 2-ўринда, «Металлург» эса 22 очко тўплаган ҳолда 6-ўринни эгаллаб турибди.

Учрашув 12 сентябрь куни соат 19:00да Бекободдаги ўйингоҳда бошланади.