Кўпгина мутахассисларнинг наздида бу йил ғолиб бўлишга даъвогар – "Ман Сити". Лекин Пеп шогирдлари янги мавсумни оғир жамоага қарши баҳс билан бошлашмоқда. “Вулхерхемптон” ўтган мавсум икки марта доғда қолдирган “шаҳарликлар”ни, умумий – олти ўйиннинг биттасидагина мағлубиятга учрашган, шу ҳам барвақт олинган қизил карточканинг ҳисобига. Нуну Эшпириту йигитлари чиндан ҳам “Манчестер Сити” кушандасига айланиб бўлишган.

Хўш, янги мавсумда ҳам улардан шундай ишни кутишимиз мумкинми? Нега кутмас эканмиз, “бўрилар” биринчи турни зўр бошлаб олишди – чақилмас “Шеффилд” уйидан ғалаба, бу галгиси қадрдон “Молинью стэдиум”даги ўйин.

Бунинг устига Гвардиола ихтиёрида кўп ўйинчилар йўқ. Агуэронинг йўқлигига ўрганиб бўлдик, Ляпорт энди-энди қайтди машғулотга, Гюндоганда сал аввал коронавирус аниқланди – карантинга кетди.

Мана шунча муаммолари билан манчестерликлар саф тортишади. Аммо биз биламизки, Пеп ўйинга кутилмаган недир улашади. Шу “недир”ни кузатиш учун 00:15дан бошланадиган учрашувга сиз азизларни таклиф этамиз. Биргаликда томоша қиламиз.