Яқиндагина «Женоа» клуби билан шартнома имзолаган Элдор Шомуродовнинг агенти Қаххор Мўминов трансфер тафсилотлари билан ўртоқлашади. «Pro Sport Menegment» аъзоси Шомуродовнинг олдида бошқа вариантлар ҳам бўлганини яшириб ўтирмади.

“2017 йилда биз Элдор билан ҳамкорликни бошлаган эдик. Ёдимда бор, уни илк бор кўрганимизда Европада тўп суришга қодир футболчи эканлигини сезганмиз. Эътиборлиси шундаки, унинг ўзи ҳам Европага кетишни истади. Унинг майдондаги ҳаракатларини кўргач, бунинг имкони бор эканлигини сездик.

Биз барчасини амалга ошириш мақсадида режа туздик. Унга кўра, Элдор аввалига РПЛда ўзини кўрсатиши лозим эди. Режамизнинг биринчи қисмини Шомуродов мукаммал адо этди. Энди эса, режанинг иккинчи қисми ҳам амалга оширди.

Эътиборлиси шундаки, Элдор билан бир нечта Осиё грандлари қизиқиб қолган эди. Яхши маош ва хотиржам ҳаёт тарзи таклиф қилинганига қарамай, Элдор Европага йўл олишни афзал кўрди. Айниқса, Қитъа биринчилигидан сўнг, у билан Хитой, Саудия Арабистони, Қатар клублари жиддий қизиқиб қолган эди. У бугунги кунда Осиё футболининг энг ёрқин юлдузларидан бири. Қувонарлиси шундаки, Элдор молиявий қулай имкониятларни рад этди ва Европага йўл олди.”