Қозоннинг "Рубин" клуби РПЛнинг 11-тур доирасида "Краснодар" (1:3) клубига қарши ўйинни бошқариб борган ҳакамдан норози бўлиб, шикоят хати ёзди.
"БИЗНЕС Online" порталининг маълумотига кўра, қозонликлар учрашув бош ҳаками Михаил Вилков VAR қоидаларини бузган деб айтишмоқда.
Гап учрашувнинг 43-дақиқаси ҳақида кетмоқда. "Рубин" ҳимоячиси Илья Самошников ўз жарима майдончаси ичида тўпни қўли билан ўйнади, бироқ, Вилков тўп ўйинга киритилганидан кейин ўша вазиятни қайта кўра бошлади. VAR қоидаларига кўра, тўп ўйинга киритилганидан сўнг, VAR орқали содир бўлган воқеани кўриш мумкин эмас.
Эслатиб ўтамиз, ўша вазият якунига кўра, "Рубин" дарвозаси томон пенальти белгиланди. Шу сабабли, ваколатли органлар протокол бузилганини аниқласа, у ҳолда учрашув қайта ўтказилади.
