"Аякс" тарбияланувчилари орасида Раян Гравенберх алоҳида истеъдод эгаси сифатида ажралиб туради. 18 ёшли марказий яримҳимоячи клуб тарихидаги энг ёш дебютант ва гол муаллифи ҳисобланиб, аста-секинлик билан ўз лидерлик салоҳиятини исботлаб келмоқда.

Жисмоний томонлама спринтерлик маҳорати ва майдонни максимал кўра билиши унинг ўйинида яққол кўзга ташланади. Шундан бўлса керак, йигитчани ҳозирданоқ Поль Погбага қиёслашётгани катта бир гап. Бир томондан, бунда етарлича асослар ҳам мавжуд. 17 та расмий учрашувда киритилган иккита гол ва тўртта пас билан Раян Тен Хагнинг муҳим ўйинлардаги асосий фигураларидан бирига айланган.

Гравенберх 16 ёшидаёқ фаолиятидаги ўзи учун муҳим саналган илк кубогини қўлга киритди. "Де Тоэмост"нинг лигалари орасида энг кучли тарбияланувчига топшириладиган "Абдулҳақ Нури" соврини Раяннинг келгуси марраларида илҳомлантирувчи стимул бўлиши шубҳасиз. Шунингдек, қаҳрамонимизнинг миллий жамоада ҳам ишлари чакки эмас. 17 ёшли ўсмир учун тенгқурлари ўртасидаги Европа чемпионатини забт этиш оламшумул натижа бўлса керак. Ҳар қалай футболчи шунга яраша меҳнат ҳам қилмоқда. У ички чемпионат доирасидаги дастлабки бешта ўйиндан учтасида майдонга тушди. Қолган баҳсларда унинг қайдномага киритилмаганида нидерландияликнинг ҳечам айби йўқ. Ноқулай вазиятда юқтириб олинган коронавирус ўзини кейинги учрашувларга руҳий томонлама яхшилаб тайёрлаб олиши учун қулай имконият бўлиши керак. Ҳали Чемпионлар Лигасининг ҳал қилувчи паллаларида Гравенберх сингари ёшлар Тен Хагга кўп асқаташи тайин.

Шунингдек, яқинлашиб келаётган мусобақалар олдидан Раян ягона кўзга кўринган футболчи эмас. "Аякс"нинг янги авлоди ичида Юриан Тимбер исмли футболчи ҳам бор. 19 ёшли иқтидор эгасига асосий таркибдан жой берилиши биланоқ унга 2-рақам топширилгани диққатга сазовор. "Аякс"нинг бугунги тактикасида Тимбернинг ўрни ўзгарувчан. Асосан марказий ҳимоядаги масъулиятни ўз бўйнига олувчи Юриан ҳужумдаги ранг-барангликни ошириш мақсадида қанотга ҳам ўтиб ўйнайверади.

Сержиньо Дестнинг жамоадан кетиши унга етарлича ўйин амалиётини бермоқда. Тимбер шу пайтгача эндигина 3та ўйинда майдонга тушган бўлса-да мураббийнинг унга бўлган ишончи юқори даражада. Унинг голларда билвосита иштирок этиши, тартибли ва мустаҳкам ҳимоявий ўйини клуб мутасаддиларига манзур келмоқда.

Футболчи жамоаси билан 2024 йилгача амалдаги шартномани имзолади. У ва акаси Куинтен сингари талантларнинг очилиб кетишида "Аякс" яхшигина трамплин вазифасини ўтаб беради. Клубда Раян ҳамда Тимбердан ташқари асосий таркиб учун курашда яна бир қатор ёш футболчиларга ҳам имконият тақдим этилмоқда. Уларнинг кўпчилиги катта ўйинларда ўзини кўрсатиш учун максимал даражада ҳаракат қилишмоқда. Мисол учун, Николас Таляфикога ўринбосар сифатида кўрилаётган Девайн Ренч, клуб дебютантлари орасидаги энг ёш гол муаллифи бўлган Наджи Унювар, "Ман Сити" қизиқиш билдираётган ва У-17 Жаҳон чемпионати тўпурари Сонтье Хансен, шунингдек 21та учрашувда аллақачон 12 та голни ўз ҳисобига ёзиб улгурган Брайaн Броббей Тен Хагнинг айни пайтда алоҳида ишонч билдираётган шогирдлари сирасига киради. Бу рўйхатни ҳали яна бемалол давом эттиришимиз мумкин. "Де Тоэмост" тизими анчайин кенг қамровли йўлдан боради. У ерда мураббийлар фақатгина маҳаллий футболчилар билангина чекланиб қолишмайди. Хорижий давлатларнинг бир қатор академиялари билан ҳамкорликда 1000дан зиёд ёшлар учун тенг имконият муҳити яратиб берилади. Улардан энг йириги - "Герминал Беерсхот" мактаби.

Биз бежизга юқорида ёш ва умидли футболчиларга алоҳида урғу бериб ўтмадик. Зеро, яқин мавсумлар оралиғида улар Европанинг топ-клублари эътиборига тушса хам ажаб эмас. "Аякс"да вояга етган йигитларнинг эса кейинчалик қандай марраларни забт этаётганликларини барчамиз бирдек кўрмоқдамиз. Бу йўлда эса уларга омад тилаб қоламиз.

Юсуфбек тайёрлади.