Европа чемпионлар лигаси гуруҳ босқичининг 1-тури доирасида «Реал» ўз уйида «Шахтёр»ни қабул қилиб, сенсацион тарзда мағлуб бўлди.

Украиналиклар Мадридга асосий таркибнинг 7-8 нафар аъзосини олиб кела олишмаган эди. Шунга қарамай, "кончилар" ўйин бошида бутун жамоа бўлиб ҳимояланди, кейинчалик тўпни назорат қила бошлади, ундан сўнг қарши ҳужумлар ва бўлимнинг иккинчи ярмида позицион ҳужумлар ташкил эта бошлади.

Биринчи бўлим тўлалигича "Шахтёр" ҳисобига ёзилди. Улар дастлаб 100 фоизли икки имкониятдан фойдалана олмаган бўлишча, кейинчалик танаффусга қадар бир эмас, икки эмас, нақ 3 марта "Реал" дарвозасини ишғол қилишди.

Зидан эса иккинчи бўлим бошида майдонга Бенземани туширди. 54-дақиқада эса Модрич олис масофадан аниқ зарба билан "Мадрид"нинг қайтишини бошлаб берди. Орадан беш дақиқа ўтиб Винисиус Жуниор майдонга тушдию, ўша заҳоти рақибдан тўпни "ўғирлаб" кетиб, ҳисобни 2:3га етказди.

Шундан сўнг "Шахтёр" ўзига келиб олиб, хавфли ҳужумлар ташкил эта бошлади. Биринчи бўлим қаҳрамони Тете иккита ўта қулай вазиятлардан фойдалана олмади.

Ўйинга қўшиб берилган дақиқаларда Вальверде 16 метрдан зарба йўллаб, дарвозани ишғол қилди. Аммо зарба пайтида офсайдда турган Винисиус дарвозабон нигоҳларини тўсиб тургани учун гол бекор қилинди.

Шу тариқа, "Реал"нинг камбеки амалга ошмай қолди ва жамоа ЕЧЛни мағлубият билан бошлади.

Европа чемпионлар лигаси, "В" гуруҳи. 1-тур
Реал Мадрид Испания – Шахтер Украина 2:3 (0:3, 2:0)
Голлар: 0:1 – 29 Тете, 0:2 – 33, автогол Варан, 0:3 – 42 Соломон, 1:3 – 54 Модрич, 2:3 – 59 Винисиус Жуниор.
Реал Мадрид – Куртуа, Варан, Марсело, Менди, Милитао, Модрич (Кроос, 70), Каземиро, Родриго (Бензема, 46), Вальверде, Асенсио, Йович (Винисиус Жуниор, 59).
Шахтёр – Трубин, Корниенко, Додо, Бондарь, Хочолава, Маркос Антонио (Вьюнник, 90), Соломон (Витао, 90), Тете, Майкон, Дентиньо (Судаков, 86), Марлос.
Огоҳлантиришлар: Корниенко (8), Асенсио (34), Бондарь (83), Милитао (87).