Каталониянинг «Барселона» клуби ҳимоячиси Жерар Пике жамоанинг собиқ бош мураббийи Эрнесто Вальверденинг нима сабабдан эгаллаб турган лавозимидан четлатилганини тушунмаслигини айтиб ўтди.
«Мен ҳалигача нима учун Эрнесто Вальвердени истеъфога чиқаришганига тушунмайман. Қолаверса, бу ҳодиса мавсум ўртасида рўй берди. Унинг охиригача ишлашига имконият беришмади. Бу нотўғри. Унинг қўл остида Ла Лигада пешқадам эдик, икки марта Испания чемпионатида ғолиб чиқдик.
Клуб бундай бўшатишларни амалга оширганда, афсоналарга бўлган муносабат аниқ бўлади. Вальвердедек инсонлар «Барселона» клуби структурасида ишлашлари шарт. Гвардиола, Хави, Пуйоль ва Вальдеслар ҳам. Уларнинг "Барселона" ривожи учун ишламаётгани катта муаммо деб ўйлайман», — деди Жерар Пике.
