Аввалроқ матбуот орқали "Андижон" футболчилари "Сурхон" жамоасига қарши бой берилган учрашувдан сўнг, клуб раҳбарияти томонидан калтакланганлиги ҳақида хабарлар тарқалганди.

Ўзбекистон Футбол Ассоциацияси биринчи вице-президенти, Ўзбекистон Жисмоний тарбия ва спорт вазирлиги биринчи ўринборсари Равшан Ирматов Sputnik интернет нарши учун берган интервьюсида "Сурхон" ва "Андижон" жамоалари ўртасидаги учрашувдан сўнг бирор-бир воқеа содир бўлганини эшитмаганини айтиб ўтди.

"Йўқ, мен бу ҳақда ҳеч нарса эшитмадим. Агар нимадир рўй берганида албатта эшитган бўлардим. Бу нотўғри, — деди Ирматов. — Бизда ЎФА томонидан хизмат сафарига юборилган, ўйинни ташкиллаштирувчи шахс - учрашув комиссари бор. Агар нимадир рўй берганида албатта улар кўрган бўлардилар, бундай воқеани кўрмай қолишлик - имконсиз. Агар бу воқеа содир бўлганида ўйин протоколига ёзилган бўларди. Ўйин протоколига бундай нарса ёзилмаган"-дея қўшимча қилди Равшан Сайфуддинович.

"Сурхон" жамоасига қарши ўйиндан сўнг, "Андижон" клуби бош директори Дониёр Муллажонов жамоа бош мураббийи Бахтиёр Ҳамидуллаевнинг ишдан бўшаганлиги ҳақида интервью берганди.