Aнглиянинг «Ливерпул» жамоаси ҳужумчиси Муҳаммад Салаҳ NBS телеканалининг «Men In Blazers» кўрсатуви меҳмони бўлди. Миср терма жамоаси юлдузи ўша кўрсатувда ўзининг рақобатдан қўрқмаслиги, келажаги ва ўзига нисбатан талабчанлиги ҳақида фикр билдирди.
“Менимча буни тан олиш лозим. Aгар сиз доимо ғалаба қозонсангиз, ғалабага чанқоқлик камайиши мумкин. Aйнан шу омил якунда футболчиларни катта саҳнадан эрта тушиб кетишга сабаб бўлади. Aгар футболчи озига нисбатан талабчанлигини бир сонияга ҳам камайтирмаса, у ўсишдан, ўрганишдан тўхтаб қолмайди. Мен ўзимдаги ғалабага харисликни йўқолиб қолмаслиги учун ҳаракат қиламан. Сиз ўзингизни бошқаришингиз ва ҳиссиётларни жиловлаш учун ўзингизда куч топишингиз жуда муҳим. Фақат олдинга қадам ташлашда бу хислат жуда катта роль ижро этади.
Aйни дамда, «Ливерпуль»да рақобат жуда кучли. Бу жамоамиздаги ҳужумчиларга янада кучли бўлишда кўмак беради. Бобби (Фирмино ҳақида гап кетмоқда) ва Садиолар менинг энг яқин дўстларим, бироқ уларнинг кўп гол киритиши мени янада олдинга интилишим учун кўмак беради. AПЛнинг барча ҳужумчилари киритган голлардан руҳланаман. Янада кучли бўлишим, кўпроқ гол киритишим кераклиги ҳақида бош қотираман. Мен нафақат AПЛ, балки бутун Европадаги футболчилардан кўпроқ гол киритишни истайман. Бу ишни қандай уддалаш борасида бош қотирмайман. Сабаби, менинг менталитетимда бу хислат мавжуд.
Ҳозир айтган сўзларим кимгадир ёқмаслиги мумкин, аммо мен Европанинг энг сермаҳсул ҳужумчиси бўлишни истайман. Бунинг учун нима қилиш керак бўлса, барчасини амалга оширишга тайёрман. Мен ҳақидаги бошқаларнинг фикри билан ҳеч қачон қизиқмаганман. Очиғи мен учун бу аҳамиятисиз. Менга айни дамда, киритган голларим ва амалга оширган ассистларим ҳаммасидан муҳим! Умид қиламанки, ўз карьерам сўнггида, AПЛдаги энг яхши тўпурар мақоми билан бутсаларимни михга илиш орзусидаман.”
Дарҳақиқат, Салаҳ секин-асталик билан «Ливерпуль» жамоасининг барча замонлардаги энг яхши тўпурарлари сафида юқорилаб бормоқда. Қаҳрамонимиз «Мерсисайдликлар» сафида 159 та ўйинда иштирок этди ва 100 та гол киритди. Бу натижа киши кўзини қамаштиради, аммо унинг ортида каттагина меҳнат ётибди. Унинг Aнглиядаги илк мавсуми ёдингиздами? Оша чоғлари жуда кўпчилик Салаҳни бир мавсум футболчиси деб атаган эди.
Мисрлик ҳужумчи аслида ундай эмаслигини исботлаб келмоқда. Эътиборлиси шундаки, айнан у Юрген Клопп тузган «даҳшатли» «Ливерпуль»нинг ажралмас бўлагани саналади. «Ливерпуль»нинг 30 йиллик танаффусдан сўнг яна тахтга қайтгани, ЕЧЛда зафар қучгани ҳақида хотирланар экан, барчанинг ҳаёлига биринчи бўлиб жингалак сочли йигит келиши турган гап. Салаҳ аллақачон «Ливерпул»нинг тарихидан ўрин эгаллади, бироқ у ўсишдан тўхтаб қолмоқчи эмас. Бу таҳсинга сазовор!
