Ҳамюртимиз Элдор Шомуродовнинг агенти, ProSport Management вакили Қаҳҳор Мўминов мижозининг манзилига айтилган танқидга ўз муносабатини билдирди.
Таниқли футбол агенти Марко Трабукки яқинда 25 ёшли ҳамюртимизнинг трансферини италияликлар учун омадсиз деб атаганди.
«Эҳтимол, Марко яхши мутахассисдир, лекин у футболни кам томоша қилади ва у ҳақда кам тушунчага эга. У ўзини италияликлар учун футбол мутахассиси сифатида намоён қилмоқда.
Элдор кўникиш босқичида, афсуски, уч ҳафтани жароҳат сабабли ўтказиб юборди. Ўтган куни "генуя дерби"сида асосий таркибда майдонга тушди ва яхши ўйин намойиш этиб, Скамаччи киритган биринчи голда иштирок этди. Жамоа муҳим ўйинда ғалаба қозонди. Кундалик ҳаётда ҳаммаси жойида, у итальян тилини ўрганмоқда. Умуман олганда, ҳаммаси режа остида кетмоқда», – деди Мўминов.
