Хабарингиз бор, Ўзбекистон кубогининг чорак финалидан ўрин олган баҳсда “Насаф”га имконият бой берилганидан сўнг, "Навбаҳор" учун жорий йилги мавсум якунланди.

Coca Cola Суперлига баҳслари эса 3 декабрь куни ўз ниҳоясига етганди. Шундан сўнг, тез орада, яъни, 7 декабрь кунидан Ўзбекистон кубоги ўйинлари бошланганлиги боис, биз “Навбаҳор”нинг Суперлига–2020даги статистик маълумотларига тўхтала олмагандик.

Кўпчилик мухлисларни “лочинлар”нинг миллий чемпионатимизнинг якунланган мавсумида қайд этган статистик натижалари қизиқтиришини инобатга олган ҳолда, “Навбаҳор”нинг Суперлига–2020даги статистик маълумотларига тўхталишга қарор қилдик.

Якунланган мавсумда "Навбаҳор" 26 та учрашув ўтказиб, 8 та ўйинда ғалаба қозонди, 11 та баҳсда дурангга эришиб, 7 та ўйинда мағлубиятга учради. Тўплар нисбати – 24-21 ни ташкил этган ҳолда, “Навбаҳор” жами 35 очко тўплади ва якунда турнир жадвалида 8-ўринни эгаллади.

Эътиборлиси, Суперлига–2020 да “лочинлар” Наманганда, яъни ўз уй учрашувларини ўтказадиган “Марказий” ўйингоҳда мағлубиятга учрашмаган. “Навбаҳор” Наманганда ўтказилган 11 та баҳснинг  6 тасида зафар қучиб, 5 та ўйинда дурангга имзо чекди ҳамда ўз майдонидаги учрашувларда жами 23 очко тўплади.

Ўз майдонида бўлиб ўтган ўйинларда “лочинлар” рақиблар дарвозасига 12 та гол уриб, ўз дарвозаларидан  3 та тўп ўтказиб ўтказиб юборишди.

"Навбаҳор" сафарда ҳам 11 та учрашув ўтказиб, 2 та ютуқ, 4 та дуранг ҳамда 5 та мағлубиятни қайд этган ҳолда, жами 10 очко тўплади. Сафар ўйинларида наманганликлар 10 та гол уриб, ўз дарвозаларидан 14 та тўп ўтказиб юборишди.

Хабарингиз бор, карантин сабабли, Суперлиганинг 10-13-турлардан ўрин олган баҳслари марказлашган ҳолда, Тошкентда ўтказилди.

Мазкур  4 та ўйинда “Навбаҳор” 2 та дуранг ҳамда 2 та мағлубиятни қайд этиб, жами 2 очко эгасига айланди.

Нейтрал майдонларда бўлиб ўтган ўйинларда “лочинлар” 2 та гол уриб, ўз дарвозаларидан 4 та тўп ўтказиб юборишди.

“Навбаҳор” ПФК матбуот хизмати.