Xabaringiz bor, O‘zbekiston kubogining chorak finalidan o‘rin olgan bahsda “Nasaf”ga imkoniyat boy berilganidan so‘ng, "Navbahor" uchun joriy yilgi mavsum yakunlandi.

Coca Cola Superliga bahslari esa 3 dekabr kuni o‘z nihoyasiga yetgandi. Shundan so‘ng, tez orada, ya’ni, 7 dekabr kunidan O‘zbekiston kubogi o‘yinlari boshlanganligi bois, biz “Navbahor”ning Superliga–2020dagi statistik ma’lumotlariga to‘xtala olmagandik.

Ko‘pchilik muxlislarni “lochinlar”ning milliy chempionatimizning yakunlangan mavsumida qayd etgan statistik natijalari qiziqtirishini inobatga olgan holda, “Navbahor”ning Superliga–2020dagi statistik ma’lumotlariga to‘xtalishga qaror qildik.

Yakunlangan mavsumda "Navbahor" 26 ta uchrashuv o‘tkazib, 8 ta o‘yinda g‘alaba qozondi, 11 ta bahsda durangga erishib, 7 ta o‘yinda mag‘lubiyatga uchradi. To‘plar nisbati – 24-21 ni tashkil etgan holda, “Navbahor” jami 35 ochko to‘pladi va yakunda turnir jadvalida 8-o‘rinni egalladi.

E’tiborlisi, Superliga–2020 da “lochinlar” Namanganda, ya’ni o‘z uy uchrashuvlarini o‘tkazadigan “Markaziy” o‘yingohda mag‘lubiyatga uchrashmagan. “Navbahor” Namanganda o‘tkazilgan 11 ta bahsning  6 tasida zafar quchib, 5 ta o‘yinda durangga imzo chekdi hamda o‘z maydonidagi uchrashuvlarda jami 23 ochko to‘pladi.

O‘z maydonida bo‘lib o‘tgan o‘yinlarda “lochinlar” raqiblar darvozasiga 12 ta gol urib, o‘z darvozalaridan  3 ta to‘p o‘tkazib o‘tkazib yuborishdi.

"Navbahor" safarda ham 11 ta uchrashuv o‘tkazib, 2 ta yutuq, 4 ta durang hamda 5 ta mag‘lubiyatni qayd etgan holda, jami 10 ochko to‘pladi. Safar o‘yinlarida namanganliklar 10 ta gol urib, o‘z darvozalaridan 14 ta to‘p o‘tkazib yuborishdi.

Xabaringiz bor, karantin sababli, Superliganing 10-13-turlardan o‘rin olgan bahslari markazlashgan holda, Toshkentda o‘tkazildi.

Mazkur  4 ta o‘yinda “Navbahor” 2 ta durang hamda 2 ta mag‘lubiyatni qayd etib, jami 2 ochko egasiga aylandi.

Neytral maydonlarda bo‘lib o‘tgan o‘yinlarda “lochinlar” 2 ta gol urib, o‘z darvozalaridan 4 ta to‘p o‘tkazib yuborishdi.

“Navbahor” PFK matbuot xizmati.