"Бавария" бошқарув кенгаши раиси Карл-Хайнц Румменигге Бундеслиганинг 13-тури доирасида бўлиб ўтган "Байер"га қарши ўйинда эрта захирага олинган Лерой Сане ҳақида ўз фикрини билдирди.

"Лерой алмаштирилганидан норози бўлди. Бу тушунарли. Худо уни беқиёс иқтидор билан сийлаган, лекин у ҳали "Бавария" генини олишга улгурмади.

У "Бавария"га ўтиши учун биз барча ишни қилдик. Биз уни руҳлантиряпмиз, унга ёрдам беряпмиз, лекин, шу билан биргаликда, талаб ҳам қиляпмиз. У кейинги поғонага кўтарилиши керак.

"Бавария"да унинг келажаги порлоқ эканига ишонаман. Биз унга ёрдам беришга тайёрмиз. Лекин у ҳам ўзига талаб қўйиши керак", – деди Румменигге.

Эслатиб ўтамиз, Сане "Байер"га қарши ўйинда жуда ёмон ҳаракат қилгани учун баҳснинг 32-дақиқасида захирага олинди. Якунда мюнхенликлар 2:1 ҳисобида ғалаба қозонишди. Лерой Бундеслига доирасида 11та учрашувда майдонга тушиб, 3та гол урди ва 3та ассистни амалга оширди.