«Пахтакор» бош мураббийи Шота Арвеладзе ўз лавозимини тарк этди. Бу ҳақда мутахассис инстаграмдаги саҳифаси орқали хабар тарқатди.

"Уч йил ўтди. Мен бугун «Пахтакор» бош мураббийи лавозимидан истеъфога чиқдим. Ажойиб, чиройли ва омадли йиллар учун миннатдорчилик билдираман. Мухлисларга, жамоага, ўйинчиларга ва бизни қўллаб-қувватлаган барчага раҳмат айтаман. Бобур Шодиев, Улуғбек Муҳаммедов, Дмитрий Адисман ва «Пахтакор» раҳбариятига миннатдорчилик билдираман. Биз бу вақт давомида муваффақиятга эришишга ҳаракат қилдик. Биз жамоага ёш футболчиларни жалб қилишимиз, шунингдек, биз клубнинг ўйин услубини ўзгартиришимиз керак эди. Клубга бундан кейин ҳам ғалаба қозонишда ва кучли бўлишда давом этишини тилайман.

Мен энди «Пахтакор» бош мураббийи эмасман. Аммо жамоа мухлиси бўлиб қоламан. Мен учун бу жамоадаги фаолият катта тажриба бўлди ва Тошкентдаги ҳаётим фантастик ўтди. Биз ажойиб жамоа бўлдик. Буни ҳеч қачон унутмайман", — дея ёзди Шота Арвеладзе.