Ўтган мавсум якунларига кўра, Суперлигани тарк этган «Бухоро» жамоасига янги бош мураббий тайинланди. Бу лавозимда Даврон Файзиев иш бошлади.

2019 йилги мавсумда «Динамо» клуби бош мураббийлигини тарк этгач, 2020 йилги мавсумда «Қўқон-1912» жамоаси бош мураббийи Бахтиёр Ашурматовга ёрдамчи сифатида фаолият юритган Даврон Файзиев 2021 йилдан фаолиятини яна бош мураббий сифатида давом эттирадиган бўлди.

Бухоро вилояти ҳокими вазифасини бажарувчи Ботир Зарипов ва клуб бош директори лавозимига иш бошлаган Жамол Алимов билан учрашган Даврон Файзиев янги жамоаси билан шартнома имзолаб, «Бухоро» клуби бош мураббийи сифатида иш бошлади. Мураббий олдига «Бухоро» жамоасини 2021 йилда Суперлигага олиб чиқиш вазифаси қўйилган.

Даврон Файзиевга мураббийлар штабида бухоролик маҳаллий мутахассислар – Мирислом Ҳасанов, Суҳроб Қобилов ва дарвозабонлар мураббийи Нурилло Ҳабибов ёрдам берадиган бўлди.

Маълумот учун, «Бухоро» жамоаси 2020 йилги мавсумда 26 ўйинда 1 ғалаба, 11 дуранг ва 14 марта мағлубиятга учраб, 14 очко билан сўнгги 14-ўринни эгаллаб, Суперлигани тарк этди.