Маълумингизким, 29 февраль куни Ўзбекистон терма жамоаси ЖЧ-2014 III саралаш босқичи доирасида кунчиқар юрт пойтахтида Японияга миллий терма жамоасига қарши майдонга чиқади.
"Куч — бирликда!" шиори остида ҳаракат қилувчи Ўзбекистон терма жамоалари фан клуби футболчиларимизни бевосита "Тойота" стадионидан қўллаб-қувватлаш истагида бўлганларни Токио сафарига чорламоқда.
7 кун давом этувчи ушбу сафар ЎФФнинг бевосита раҳнамолиги остида бўлиб ўтади. Ҳозирданоқ барча шароитлар ҳозирланган. Токиога тўғридан-тўғридан учувчи авиалайнерга, стадионга чипталар буюртма қилинган. Мухлисларни барча қулайликларга эга бўлган автобуслар ташийди, улар Токио марказида жойлашган 4 юлдузли "Prince" меҳмонхонасида истиқомат қилишади.
23 февралдан 2 мартгача давом этадиган сафар мобайнида замонавий Токио мегаполисининг диққатга сазовор жойларини томоша қилиш билан биргаликда, Япониянинг қадимий осори-атиқалари жойлашган ҳудудларга ҳам зиёрат уюштирилади. Сафар давомида япон, рус ва ўзбек тилида гаплашувчи гидлар хизматда бўлади.
Мухлисларга фан-клуб атрибутикалари, терма жамоа футболкалари тарқатилади.
Япония сафарига боришни хоҳловчилар Ўзбекистон терма жамоалари фан-клуби раиси Абдураҳмон Фозиловга мурожаат қилишлари сўралади. Телефон: (+99897) 400-20-04
