Махачқалъанинг "Анжи" клуби ҳужумчиси Диего Тарделли яқин вақт ичида Қатарнинг "Ал-Ғарафа" клуби ўйинчисига айланиши мумкин. Бу ҳақда Бразилиянинг Globo Esporte нашри хабар бермоқда.
Манба маълумотларига кўра, Осиё клуби Тарделли шахсий шартнома шартларини тақдим этиб бўлган. Футболчи якуний қарорни 5 январь куни қабул қилиши кутилмоқда.
Аввалроқ Тарделли "Анжи"нинг молиявий талаблари сабаб Бразилияга қайта олмаганини айтиб ўтганди. Айни вақтда, футболчининг агенти унинг мижози Қатар клубларидан бирига ўтиши мумкинлигини маълум қилганди.
Эслатиб ўтамиз, "Анжи"ни тарк этиш истагида бўлган Тарделлининг Тошкентнинг "Пахтакор" клубида пайдо бўлиши ҳақида ҳам миш-мишлар тарқаган, аммо жамоа расмийлари ушбу хабарларни рад этишганди.
