"Насаф" бош мураббийи Анатолий Демяненконинг 5 январь куни Луцкнинг "Волинь" клуби бош мураббийи сифатида таништирилиши ҳақидаги гап-cўзлар миш-мишдан бошқа нарса эмас. "Насаф" расмий сайтида эълон қилинган хабарда шундай дейилади.
"Хабарингиз бор, бир қатор спорт нашрлари ва веб-сайтларида қаршиликлар бош мураббийи Анатолий Демяненко ва унинг ёрдамчиларининг Украинанинг "Волинь" (Луцк) жамоаси билан шартнома имзолаши хусусида гап-сўзлар тарқалганди. Ҳатто Демяненконинг 5 январь куни Украина футбол клубида бош мураббий сифатида расман таништирув маросими ўтказилиши хусусида ҳам хабарлар эълон қилинди. Аммо бу хабарлар ҳозирча миш-мишдан бўлак ҳеч нарса эмас", дейилади "Насаф" расмий сайтидаги хабарда.
Хабарга кўра, янги мавсумда ўз олдига жиддий мақсадларни қўяётган "Насаф" жамоаси аъзолари 5 январь куни Тошкентдаги "Золотая долина" меҳмонхонасида йиғилади. Сўнгра эртаси куни футболчилар тиббий кўрикдан ўтишади. "Насаф" жамоаси мураббийлар штаби ҳамда ўйинчилари режага мувофиқ пойтахтимизда янги мавсум тараддудига киришадилар. Бош мураббий Анатолий Демяненко ҳамда унинг ёрдамчилари, шунингдек, барча легионер футболчилар мазкур йиғинга ўз вақтида етиб келиши кўзда тутилган.
