«Андижон» футбол клуби ўйинчилар олдидаги қарзларни ёпмоқда. Бу ҳақда ЎзПФЛ бош директори Диёр Имомхўжаев ўзининг телеграм-каналида маълум қилди.

Клуб Виталий Мирний билан ишни тўлиқ якунлади. ФИФА бу бўйича ишни кун тартибидан олиб ташлади.

Радослав Алексич масаласи ҳали очиқ. Клуб мазкур футболчи билан ишлашни бошлаган. Катта эҳтимол билан уч кун ичида «Андижон» бу муаммони ҳам ҳал қилади. Шунингдек, клуб Ибе Микаэль Окоро билан қарздорликни 40 кун ичида бартараф этиш керак.

Эски «Андижон»дан қолиб кетган яна бир мерос бор — Предраг Вуйович. ФИФА 25 февралда ишни кўриб чиқади. Клуб эса аллақачон футболчининг юристи билан алоқага чиққан ва музокара давом этяпти. Ўйлашимизча, «Андижон» 25 феврални кутиб ўтирмай, бу ишни ҳам ҳал қилмоқчи.

Қолгани ўзбекистонлик футболчи ва мураббийлар билан қарздорликлар масаласи. Бу борада Футболчилар уюшмаси иш олиб боради ва ҳар бир даъвогар учун алоҳида муддатлар келишилинади.

«Андижон» клубининг янги раҳбарияти охирги ярим йилда катта ишни амалга оширди. Улар клубни параллел ушлаб туриш билан бирга, эски «Андижон»нинг барча муаммоларини ҳам ҳал қилиш билан банд.