4 январь куни жамоа билан илк машғулотларни ўтказган "Пахтакор"нинг янги бош мураббийи Деян Журжевич, жамоа мураббийлар штабига мурожаат қилиб, олдинга қўйилган мақсадларга эришишда жамоада эскидан ишлаб келаётган мутахассисларнинг кўмаги зарур эканлигини таъкидлаб ўтган. Бу ҳақда клуб расмий сайти хабар бермоқда.
"Мен бу ерда янгиман, шунинг учун сизларнинг кўмагингизга муҳтожман. Ўйлайманки, бир оила бўлиб ўз олдимизга қўйилган мақсадларимизга эришамиз", деди болқонлик мураббий мураббийлар штабига.
"Мен бугун илк маротаба футболчилар билан машғулот олиб бордим. Бошланишига ёмон эмас. Биринчи йиғинга кўплаб футболчиларимиз етиб кела олишмади. Баъзилари терма жамоа ихтиёрида бўлсалар, айримлари жароҳат олган эканлар. Шунинг учун ҳозирча бор имкониятдан фойдаланиб турамиз", деди "Пахтакор" бош мураббийи машғулотлар якунига етганидан сўнг.