"Манчестер Сити" бош мураббийи Роберто Манчинининг айтишича, қишки трансфер ойнаси вақтида клуб бир қатор футболчиларни сотиб юбориши шарт. Бу ҳақда Sky Sports хабар бермоқда.
Италиялик мутахассиснинг сўзларига кўра, жамоа учун айни вақтда керак бўлмаган бир қатор футболчилар сотиб юборилганидан кейингина янги футболчиларни сотиб олиш ҳақида гапириш мумкин. Тахминларга кўра, яқин вақт ичида "Манчестер Сити"ни ҳужумчи Карлос Тевес ва ҳимоячи Уэйн Бриж тарк этиши керак.
"Биз уч-тўрт нафар футболчини сотиб юборишимиз керак. Жуда ҳам яқин вақт ичида Тевеснинг трансфери амалга ошиши керак, унга Италия ва Франциянинг бир қатор клублари даъвогарлик қилишмоқда. Карлосда ҳаммаси жойида бўлиб, у яна футбол ўйнашни бошлайди, деб умид қиламан", деди Манчини.
"Жамоани, кўп эҳтимолки, Уэйн Бриж ҳам тарк этади. Биз кимнидир сотиб олишимиз мумкинлигини инкор эта олмайман, аммо бу воқеа бир неча футболчиларни сотганимиздан кейингина рўй бериши мумкин", деди "Манчестер Сити" бош мураббийи Роберто Манчини.
Маълумот ўрнида, аргентиналик ҳужумчи Карлос Тевес учун Италиянинг "Милан" ва "Интер" клублари даъвогарлик қилаётган бўлишса, ҳимоячи Уэйн Брижни "Ньюкасл" ижарага олишни режалаштирмоқда.