Бугун АГМК жамоаси янги мавсумга тайёргарлик йиғини доирасидаги илк назорат беллашувида Термизнинг "Сурхон" жамоасига қарши майдонга тушди.

Дўрмондаги қароргоҳ майдонида ўтган учрашувда жамоамиз ҳар иккала таймни икки хил таркибда ўтказди. Биринчи бўлимда асосан асосий таркиб футболчилари тўп тепган бўлса, иккинчи таймда кўпроқ ёшларга имконият берилди.

Учрашув жамоамизнинг тўлиқ ташаббуси ва устунлиги остида кечди. Биринчи таймда Ғофуров, Касьян, Шоаҳмедов ва Мурод Тошматов хавфли вазиятларни вужудга келтиришди. Бироқ охирги зарбада баъзан аниқлик, аксарият вазиятда эса рақиб посбони тўп йўлига ғов бўлди.

Иккинчи бўлимда ҳам жамоамиз устунлиги давом этди ва ҳужумлар ташкил этишда ҳам АГМК фаоллик кўрсатди. Учрашувнинг 75-дақиқасида ўнг қанотдан ривожлантирилган ҳужумни Элдор Бегимов жарима майдончасига оширди, Сардор Абдунабиев эса боши билан тўпни дарвозага аниқ йўллади. Ўйин финишига яқин эса Сардор Абдунабиев марказдан ривожлантирилган ҳужумни аниқ зарбаси орқали голга айлантириб, беллашувда дубль қайд этди ва учрашувда якуний ҳисобни ўрнатди - 2:0.

Ёшлар жамоасидан жалб этилган иқтидорлар бугунги баҳсда ўзларидан ёрқин таассурот қолдиришди.

АГМК жорий йилдаги илк норасмий учрашувда АГМК ишончли ғалаба тарзда ғалаба қозонди.

Назорат учрашуви.
29 январь, жума.
АГМК - "Сурхон" 2:0
Голлар: Сардор Абдунабиев (75, 90)

АГМК (1-тайм): Суҳроб Султонов (Ботирали Эргашев, 30) - Мирғиёс Сулаймонов, Аббос Отахонов, Сардор Раҳмонов, Эргаш Исмоилов - Йован Жокич, Санжар Турсунов, Санжар Шоаҳмедов - Мурод Тошматов, Александр Касьян, Ҳусниддин Ғофуров.

АГМК (2-тайм): Ботирали Эргашев (Валижон Раҳимов, 60) - Дилшод Аҳмадалиев, Бобур Йўлдошев, Жасур Умаров, Шероз Жалолов - Дилшод Жўраев, Бунёд Турғунбоев, Сарвар Аблаев - Элдор Бегимов, Камрон Абдулҳамидов, Сардор Абдунабиев.