Москванинг "ЦСКА" клуби бош мураббийи Леонид Слуцкий жамоанинг трансфер режалари ҳақида тўхталиб ўтди.

"Биз ҳар бир позицияни кучайтириш тараддудини кўрмоқдамиз. Аммо бу осон бўлмайди. Биринчи галда "ЦСКА" ўйинини кучайтириши мумкин бўлган футболчини топиш қийин. Иккинчи томондан шундай футболчи топилган тақдирда ҳам, у Россияга кўчиб ўтишни рад қилиши, ҳеч бўлмаганда клуб ёки футболчининг трансфер нарҳи борасида муаммо юзага келиши мумкин. Янги йилдаги илк йиғинда янги футболчилар синовда бўлишини инкор қилмайман. Бироқ мен яхши таянч ярим ҳимоячи ва ҳар икки қанотда ҳаракат қила оладиган ҳимоячи топишни истардим. Бу билан жамоада Одияга рақобатчи топилиб, ҳимояда соғлом муҳит юзага келарди. Чиди клубни тарк этганидан кейин бизда 2та классик қанот ҳимоячиси қолди – Набабкин ва Шченников. Қўшимчасига қанотда мажбуран ҳаракат қилаётган Леша Березуцкий".

Леонид Слуцкий "армиячилар" сафида ўйнаб кетиши мумкин бўлган умидли ёшларга ҳам тўхталиб ўтди.

"Ўринбосарлар сафидан дарвозабонлар Ревякин ва Исупов, ҳимоячи Федотов, ҳужумчи Сердеров, шунингдек ҳали жудаям ёш бўлган Лейонел Адамс биз билан илк йиғинда иштирок этишади. Адамс эндигина 17 ёшга қадам қўйди ва у хаттоки ёшлар таркибида майдонга тушиб улгурмаган. Чунки у футболчи жуда танқис бўлган марказий ҳимояда, қўшимчасига чап қанот ҳимоясида ҳаракат қила олади. Биз уни ўринбосарлар сафида синаб кўрмай туриб, асосий таркибга жалб қилдик".