Ўзбекистонлик ҳужумчи Элдор Шомуродов «Женоа»нинг асосий футболчиларидан бирига айланишга улгурди.

А Серия 20-турига келиб Шомуродов жами 14 ўйинда қатнашди. Уларда иккита гол ва битта голли узатма амалга оширди.

Элдор голли вазиятлар яратиш борасида генуяликлар сафида энг яхши кўрсаткич қайд этмоқда. 25 ёшли футболчи шу вақтга қадар 13 марта рақиб дарвозаси олдида хавфли вазият яратди. Бу борада кейинги ўринларда Жанлука Скамакка (10) ва Маттиа Дестро (9) бормоқда.

Шунингдек, Шомуродов голга олиб келган ҳужумларда муҳим узатмаларни ижро этишда ҳам етакчи бўлиб турибди — 6 та. Бу борада ўзбекистонлик иқтидор эгаси Лука Пеллегрини, Милан Бадель, Скамакка ва Паоло Гильоне (5 тадан) каби ўйинчиларни ортда қолдирмоқда.

«Женоа» 21 очко билан 14-ўринда бормоқда, «грифонлар» кейинги тур ўйинини 6 февраль куни «Наполи»га қарши ўтказади.