"Кьево"га қарши учрашувдан сўнг "Рома" ярим ҳимоячиси Даниеле Де Росси ўз келажаги борасида фикр билдириб ўтди. Бу ҳақда as-roma.ru сайти хабар бермоқда.

"Рома" ва "Кьево" ўртасидаги баҳс римликларнинг 2:0 ҳисобидаги ғалабаси билан якунига етди. Учрашувда ҳар иккала голни Франческо Тотти пенальтидан урди.

"Қарсаклар менинг келажагимга таъсир қиладими? Йўқ, бугунги ўйиндаги қарсаклар менинг сўнгги икки йилдан бери ўйин давомида алмаштирилмаганим билан боғлиқ эди. Луис Энрике мени қучоқлаганига эътибор қаратдингизми? Ўйлашимча, у бу ишни биз фантастик ўйин кўрсатаётганимиз учун қилди, у барча футболчиларни шундай олқишлайди", деди Де Росси.

"Луис Энрике билан алоқаларим аъло даражада. У мени жамоада қолади, деб айтдими? Бу унинг фикри ва мен уни ҳурмат қиламан. Мен ўз келажагим борасида бир қарорга келиб бўлдимми? Мен бу ҳақда гапирмасликда давом этаман, чунки келажагим борасида жуда очиқ ғояларга эгаман, мен завқ билан ишлашда давом этаман", деди "Рома" ярим ҳимоячиси.

"Бу нима дегани? Матбуотнинг кўрсатаётган эътибори ва ҳар бир эҳтиётсизлик билан айтилган сўзга Римда қандай шов-шувли муносабат кўрсатишларини ҳисобга олган ҳолда, мен нимани айтиш керак ва нимани айтмаслик кераклиги борасида аниқ тушунчага эгаман. "Рома"нинг ғалаба қозонаётганининг ўзи мен учун етарли", деди "Рома" ярим ҳимоячиси Даниеле Де Росси.

Эслатиб ўтамиз, куни кеча "Рома" раҳбарияти футболчига йилига олти миллион евро маошни кафолатлайдиган янги шартномани таклиф қилди. Футболчи ва унинг агенти шартнома шартларини ўрганиб чиқиш учун вақт сўраган. Агар Де Росси шартнома имзолашдан бош тортса, у ҳолда футболчи қишки трансфер ойнасида сотиб юборилади. Футболчига айни вақтда "Манчестер Сити", "Реал", "Интер" каби жамоалар даъвогарлик қилмоқда.