Осиё футбол конфедерациясининг маркетинг ҳамкори сифатида фаолият юритган «Lagardеre Sports» агентлиги вакили «Бунёдкор»га ташриф буюрди.
ОФК доирасидаги мусобақалар – Чемпионлар лигаси ва ОФК Кубогининг медиа ҳуқуқини сотиш билан шуғулланган «Lagardеre Sports» агентлигининг вакили, асли ўзбекистонлик, бугунги кунда БААнинг Дубай шаҳрида истиқомат қиладиган Жасур Мўминовни Тошкентга ташрифидан фойдаланиб, «Бунёдкор»га таклиф этдик.
Очиқ давра суҳбати шаклида ўтган учрашувда «Бундёкор»дан клуб директори Улуғбек Мирзаев, молия менежери Шомурод Исроилов, маркетинг мутахассислари Шуҳрат Турдиев ҳамда Ҳамза Каримов ва бошқа ходимлар иштирок этди. Жасур Мўминов футбол клубларида халқаро замонавий маркетинг услублари бўйича ўз маслаҳатлари билан ўртоқлашди. Маркетинг бўлими мутахассисларимизнинг бир қатор саволларига жавоб қайтарди, фикр алмашди. Асосийси, исталган вақтда маркетинг йўналиши бўйича маслаҳатларини аямаслигини таъкидлади.
