Теҳроннинг "Истиқлол" клуби Англиянинг "Болтон" клуби собиқ ҳимоячиси Жэйлойд Самуэль билан шартнома имзолади. Бу ҳақда ОФК расмий сайти хабар бермоқда.
1998-2007 йиллар давомида "Астон Вилла" таркибида тўп сурган 30 ёшли футболчи Осиё Чемпионлар Лигаси плей-офф босқичидан муваффақиятли ўтиш умидида таркибга жалб қилинган, дейилади ОФК расмий сайтидаги хабарда.
"Менга Англиядан таклифлар бор эди, шунингдек, Европанинг бошқа клубларидан ҳам қизиқиш бўлаётганди. Бироқ ўзим янги синовни хоҳладим ва Осиёда тўп суришга қарор қилдим", деди Самэуль "Sky Sports News"га берган интервьюсида.
Маълумот учун, Жэйлойд Самуэль "Болтон"да айни вақтда "Истиқлол" шарафини ҳимоя қилаётган Эрон терма жамоаси аъзоиси Андраник Теймуриён билан бирга тўп сурган.
Теҳроннинг "Истиқлол" клуби ОЧЛ гуруҳ босқичи йўлланмаси учун, аввалига, Эроннинг бошқа бир клуби — Исфаҳоннинг "Зоб Оҳан" жамоасига қарши майдонга тушиши, агар унда ғалаба қозонса Саудия Арабистонининг "Ал-Иттифоқ" жамоасини мағлубиятга учратиши керак.
Агар теҳронликлар плей-офф босқичидан ўта олишса, у ҳолда ОЧЛнинг "А" гуруҳидан ўрин олишади. "А" гуруҳида, Қаршининг "Насаф" клубидан ташқари, Қатарнинг "Ар-Райян" ва БААнинг "Ал-Жазира" жамоалари ўрин олган.
