Барчамизга маълумки, Ўзбекистон Республикаси Президентининг “Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида”ги фармонида футбол соҳасида бевосита фаолият олиб борадиган шахслар томонидан тотализатор ўйнаш, ўйинга ёки унинг натижасига таъсир ўтказиш мақсадида келишилган ўйинлар уюштириш, уларда иштирок этиш жиноий ва маъмурий жавобгарликка тортилиши масаласига алоҳида урғу берилган.

Шу боисдан 2021 йилги футбол мавсуми старти олдидан келишилган ўйинларга қарши кураш мавзусида тушунтириш ишлари олиб борилмоқда.

Хусусан, ЎФА ишчи гуруҳи бугун Хоразм вилоятига ташриф буюриб, футболчи ва мураббийлар ҳамда футбол ҳакамлари, назоратчилар ва футболга алоқадор мутахассислар билан давра суҳбати ташкил этди.

Шунингдек, ишчи гуруҳ вакиллари Хоразм вилояти ҳокими, вилоят футбол ассоциацияси президенти Ф. Эрманов билан учрашди. Мутасаддилар келажакда вилоят футболини янада ривожлантириш борасида фикр-мулоҳазалар олиб борди.

Учрашув якунида Ф. Эрмановнинг вилоятда футболни ривожлантириш йўлида амалга ошираётган ташаббуси қадрланиб, ЎФАнинг ташаккурнома ва эсдалик совғалари топширилди.

ЎФА масъул мутахассислари Урганч шаҳрида жойлашган ўйингоҳнинг ҳозирги ҳолати билан ҳам танишиб, яратиб берилган шарт-шароитларни кўздан кечирди.