Бир нечта Беларусь клубининг мухлислари ўз жамоалари ўйинига боришдан бош тортганини эълон қилди.

БАТЭ, «Шахтёр Солигорск», «Слуцк, «Неман», «Молодечно», «Витебск», «Минск», «Торпедо Белаз», «Торпедо Минск» ва «Динамо Брест» клублари мухлислари бойкот эълон қилган. Бунга сабаб сифатида мамлакатдаги сиёсий вазият кўрсатилган.

"Биз, «Шахтёр» фан-клуби вакиллари мамлакатдаги вазиятдан ташвишдамиз. Ҳеч ким қотиллик ва зўравонлик учун жавобгарликни ўз бўйнига олмаяпти, судьялар конституция ва қонунларга тупурмоқда, тизим эса инсон ҳаёти ҳамда тақдирини бир пулга олмаяпти.

Биз жамоани стадиондан фаол қўллаб-қувватлашни тўхтатамиз. Бироқ йигитлар, шуни билинг — биз ҳар доим ёнингиздамиз! «Живе Беларусь!», — дейилади «Шахтёр Солигорск» мухлислари мурожаатида.

Эслатиб ўтамиз, 2020 йил августда бўлиб ўтган президентлик сайловларидан кейин мамлакатда оммавий норозилик кайфияти юзага келди. Беларусда август ойида норозилик намойишлари ва намойишчиларни қўллаб-қувватлаш учун чиқишлар бўлиб ўтганди.

Маълумот учун, БАТЭ сафида Шаҳбоз Умаров, «Шахтёр Солигорск»да эса Шаҳзод Убайдуллаев каби ўзбекистонлик футболчилар тўп суради.