Испаниялик футболчи «Реал»га Чемпионлар Лигаси 1/8 финал босқичи жавоб учрашувида ёрдам бериши мумкин.
«Реал» ҳимоячиси Серхио Рамос февраль ойининг бошида ўтказган тиззасидаги жарроҳлик амалиётидан тиклашишда давом этмоқда.
Испаниялик футболчи тахминан 6 ҳафтани ўтказиб юбориши айтилган эди, аммо унинг тикланиш жараёни тезроқ кечмоқда. Манбага кўра, испаниялик футболчи 16 март куни Чемпионлар Лигаси 1/8 финал босқичида, «Аталанта»га қарши жавоб ўйинида иштирок учун барча имкониятларга эга .
Қайд этилишича, яқин кунлар Рамосни тиклашда муҳим аҳамиятга эга бўлади. Агар 34 ёшли футболчи тайёр бўлса, у Италия жамоасига қарши ўйинда майдонга тушиши мумкин.
Эслатиб ўтамиз, биринчи ўйин сафарда «Қироллик клуби»нинг 1:0 ҳисобидаги ғалабаси билан якунланган эди.
