Германия футболи ҳақида ортиқча сўз айтишга ҳожат йўқ. Миллий терма жамоа ва клубларининг қайд этаётган натижаларининг ўзиёқ немис диёрида миллионлар ўйинининг тизими қанчалик тўғри йўлга қўйилганидан дарак беради. 

Бугунги кунда Германияда болалар мураббийи сифатида фаолият юритаётган, тегишли лицензияси бор Санжар Ҳалилов «Бунёдкор»га ташриф буюрди. Болалар футболи бўйича мутахассис академиямизда ишлаётган мураббийларга кичик семинар ўтказди. Семинарда 6 ёшдан 11 ёшгача бўлган болалар билан ишлашнинг немисча усули ҳақида сўз борди. Санжар Ҳалилов Германияда мураббийлар олти ёшли болага қандай муносабатда бўлиши, машғулотларни ўтказишдаги ёндошувлар тўғрисида ўз фикрлари ва тажрибаси билан ўртоқлашди.