Суперлиганинг 1-тури доирасида бўлиб ўтган АГМК - "Локомотив" учрашувидан сўнг мезбонлар бош мураббийи Миржалол Қосимов матбуот анжуманида иштирок этди.

«Чемпионат доимгидек ҳаяжонли ўйин билан бошланди. Мавсумга яхши даражада ҳозирлангандик. Албатта стартни ғалаба билан бошлаш ёқимли. Урилган голдан кейин ташаббусни рақибга бериб қўйдик. "Локомотив"да малакали футболчилар бор ва улар ташаббусни қўлга олишгач учрашувда ҳисобни тенглаштиришди. Биз бўлим якунида тўп назоратини йўқотдик. Танаффусдан кейин вазиятни ўнгладик. Иккинчи таймда жамоамиз "Локомотив"га қараганда ва биринчи таймга нисбатан яхши ҳаракат қилди ва ўйлашимча, ҳақли ғалабага эришдик.

Доим айтаман, биз шашка эмас, балки футбол ўйнаймиз. Статистика бўйича ҳам футбол энг кўп жароҳатли спорт тури. Футболда ўйин давомида ёки машғулотларда ҳам жароҳат олиш мумкин. Биринчи ўйиннинг илк таймидаёқ иккита жароҳат ва мажбурий ўзгаришларни амалга оширдик. Ўша пайтда мени жамоанинг жисмоний ҳолати ташвишга солди. Негаки, мавсум стартида ҳали жисмонан жамоа тўлиқ тайёр ҳолатда эмас ва улар иккинчи бўлимни деярли ўзгаришсиз ўйнашларига тўғри келди. Ўйинлар орқали жамоа жисмоний ҳолатини яхшилаб боради. Лекин бизда бир-бирини ўрнини тўлдирадиган футболчилар бор. Раҳмонов оёғидан жароҳат олди. Мени кўпроқ Ботиралининг жароҳати ташвишга солди. Чунки Эргашев Қодирқулов билан тўқнашиб, бош мияси чайқалиб кетди ва маълум муддат хушини йўқотди. Лекин ҳозир аҳволи яхши. Аммо унинг ҳолатини эртанги тиббий назорат текширувларидан кейин билиб оламиз.

Ҳеч ким майдонга ютқазамиз деб тушмайди. Ҳар бир ўйинга ғалаба учун майдонга тушамиз ва мақсадни каттароқ оламиз. Бу йили чемпионат қизғин кечади. Жиззахнинг "Сўғдиёна" жамоаси таркибнинг ўзагини сақлаб қолди, "Навбаҳор" ҳам кучайди, қолаверса "Қўқон-1912" ҳам яхши жамоа. "Пахтакор" гарчи етакчилар кетган бўлсада уларни ўрнига савияли футболчилар олиб келди. Масалан, Машариповни ўрнига Рашидов келди. Айтмоқчиманки, "Пахтакор" кескин кучсизлангани йўқ ва улар кучли жамоалигича қолган. Айтадику, жўжани кузда санаймиз. Бизнинг мақсад ҳар бир ўйинга ғалаба учун майдонга тушиш ва мухлисларга ёқадиган ўйин намойиш этган ҳолда кўплаб ишқибозларни стадионга қайтариш», — деди Миржалол Қосимов.