Суперлиганинг 1-туридан ўрин олган «Бунёдкор» - «Машъал» (1:0) учрашувидан кейин ўтказилган матбуот анжуманининг иккинчи қисмида жамоамиз устози Шуҳрат Мақсудов иштирок этди.

- Аввало «Бунёдкор» клуби раҳбарияти, мураббийлари, футболчилари, ходимлари мухлислари ва шахсан ўз номимдан таниқли футболчи Темурхўжа Абдухолиқовнинг қизи вафоти муносабати билан футболчига ҳамдардлигимизни билдираман.

Футболда мавсумнинг илк ўйини барча жамоалар учун оғир ўтади. Кеча бошланган мавсумнинг дастлабки учрашувларини кўриб, бунга яна бир бор амин бўлдик. Энг асосийси ғалаба. Биз буни уддаладик. Шу боис, «Бунёдкор»га алоқадор барчани, хусусан мухлисларимизни табриклайман.

Қайси лавозимда ишлашимдан қатъий назар жамоанинг ўйинига бефарқ бўлмаганман. Кеча тақдимот маросимида ҳам айтиб ўтгандим. Биз бир жамоамиз! Гап бош мураббий ёки бошқа лавозимдамас, ҳаммамиз бир мушт ва жамоамиз! Албатта, дебютим ўйиним омадли чиқди. Аллоҳга шукр! 

Ўртоқлик учрашувларида футболчиларнинг ҳолати бошқачароқ кўринган. Бугун илк расмий ўйинда майдонга тушдик. Ўйинчиларнинг ҳаракатларида фарқ бўлиши табиий. Чунки мавсум эндигина бошланди. Истайсизми-йўқми, футболчиларда ҳаяжон бўлади. Ўйинчиларимизни нималарга қодирлигини яхши биламиз. Ўйлайманки, ўйиндан-ўйинга ҳаммаси яхши томонга ўзгаради.