Superliganing 1-turidan o‘rin olgan «Bunyodkor» - «Mash’al» (1:0) uchrashuvidan keyin o‘tkazilgan matbuot anjumanining ikkinchi qismida jamoamiz ustozi Shuhrat Maqsudov ishtirok etdi.

- Avvalo «Bunyodkor» klubi rahbariyati, murabbiylari, futbolchilari, xodimlari muxlislari va shaxsan o‘z nomimdan taniqli futbolchi Temurxo‘ja Abduxoliqovning qizi vafoti munosabati bilan futbolchiga hamdardligimizni bildiraman.

Futbolda mavsumning ilk o‘yini barcha jamoalar uchun og‘ir o‘tadi. Kecha boshlangan mavsumning dastlabki uchrashuvlarini ko‘rib, bunga yana bir bor amin bo‘ldik. Eng asosiysi g‘alaba. Biz buni uddaladik. Shu bois, «Bunyodkor»ga aloqador barchani, xususan muxlislarimizni tabriklayman.

Qaysi lavozimda ishlashimdan qat’iy nazar jamoaning o‘yiniga befarq bo‘lmaganman. Kecha taqdimot marosimida ham aytib o‘tgandim. Biz bir jamoamiz! Gap bosh murabbiy yoki boshqa lavozimdamas, hammamiz bir musht va jamoamiz! Albatta, debyutim o‘yinim omadli chiqdi. Allohga shukr! 

O‘rtoqlik uchrashuvlarida futbolchilarning holati boshqacharoq ko‘ringan. Bugun ilk rasmiy o‘yinda maydonga tushdik. O‘yinchilarning harakatlarida farq bo‘lishi tabiiy. Chunki mavsum endigina boshlandi. Istaysizmi-yo‘qmi, futbolchilarda hayajon bo‘ladi. O‘yinchilarimizni nimalarga qodirligini yaxshi bilamiz. O‘ylaymanki, o‘yindan-o‘yinga hammasi yaxshi tomonga o‘zgaradi.