Ёшлар лигасининг 4-туридан ўрин олган «Қўқон-1912» - «Бунёдкор» (1:1) учрашувидан кейин мезбонлар устози Азиз Тўхтабоевнинг фикрлари билан қизиқдик.

- Учрашувни яхши бошлагандик, аммо қизил карточка режаларимизни ўзгартириб юборди. Қизил карточкагача ҳам ундан кейин ҳам ёмон ўйин кўрсатмадик. Ҳатто бир киши кам бўлишимизга қарамасдан гол ура олдик. Танаффусдан кейин шамол бизнинг дарвозамиз томон эсишни бошлади, яна камчиликмиз, бу ўз сўзини айтди. Ўтказиб юборилган голда ҳам ўзимиз хатога йўл қўйдик. Фикримча, ютадиган учрашувда дуранг ўйнадик.

Шамол биринчи бўлимда бизнинг, танаффусдан кейин меҳмонларнинг фойдасига хизмат қилган бўлса-да, ўтказиб юборилган гол ўзимизнинг хатомиз сабабли дарвозамиздан жой олди. Рақиб комбинацион ўйин орқали ҳисобни тенглаштиргани йўқ. Дарвозамиз олдида хавфли вазиятларни юзага келтира олмади. Қолаверса, биз бир киши кам бўлиб қолдик.

Қизил карточка бўйича ҳакамнинг қарори юз фоиз тўғри. Футболчилар ҳозир шундай ёшдаки, масъулиятни ҳис қилишмайди. Бундай ёшдаги ўйинчиларда масъулиятдан кўра, шижоат, ҳиссиёт юқори бўлади. Ўйиндан кейин футболчи билан гаплашиб олдим, хатосини тушунди.