Yoshlar ligasining 4-turidan o‘rin olgan «Qo‘qon-1912» - «Bunyodkor» (1:1) uchrashuvidan keyin mezbonlar ustozi Aziz To‘xtaboyevning fikrlari bilan qiziqdik.

- Uchrashuvni yaxshi boshlagandik, ammo qizil kartochka rejalarimizni o‘zgartirib yubordi. Qizil kartochkagacha ham undan keyin ham yomon o‘yin ko‘rsatmadik. Hatto bir kishi kam bo‘lishimizga qaramasdan gol ura oldik. Tanaffusdan keyin shamol bizning darvozamiz tomon esishni boshladi, yana kamchilikmiz, bu o‘z so‘zini aytdi. O‘tkazib yuborilgan golda ham o‘zimiz xatoga yo‘l qo‘ydik. Fikrimcha, yutadigan uchrashuvda durang o‘ynadik.

Shamol birinchi bo‘limda bizning, tanaffusdan keyin mehmonlarning foydasiga xizmat qilgan bo‘lsa-da, o‘tkazib yuborilgan gol o‘zimizning xatomiz sababli darvozamizdan joy oldi. Raqib kombinasion o‘yin orqali hisobni tenglashtirgani yo‘q. Darvozamiz oldida xavfli vaziyatlarni yuzaga keltira olmadi. Qolaversa, biz bir kishi kam bo‘lib qoldik.

Qizil kartochka bo‘yicha hakamning qarori yuz foiz to‘g‘ri. Futbolchilar hozir shunday yoshdaki, mas’uliyatni his qilishmaydi. Bunday yoshdagi o‘yinchilarda mas’uliyatdan ko‘ra, shijoat, hissiyot yuqori bo‘ladi. O‘yindan keyin futbolchi bilan gaplashib oldim, xatosini tushundi.