Златан Ибраҳимович Швеция терма жамоасига беш йил деганда қайтди. Ёдингизда бор, йиғлаб юборгани ҳақидаги видео барча тармоқларни айланди. Уй соғинчи аралашиб кетган шекилли.

Швециялик юлдуз “Милан”га тўққиз йил деганда қайтган, жамоаси учун супернатижалар туҳфа этишни бошлагандаёқ термага қайтиб қолса керак, дейилганди. Қайтди. Қайтди ва Швециянинг ўйинига мазмун кирди.

Терма жамоа гуруҳида пешқадам. У келгач учта ўйинда учта ғалаба. Златан икки голга пас берди. Ўз услубида иккиси ҳам. Ўйиндан сўнг интервьюсида ўз услубида гапирди: “Мен ҳордиқ олиш учун келганман термага”.

Мен мана шу икки жамоага қайтишида ўхшашлик сезгандекман. Швеция терма жамоаси таркибида юлдузлар деярли йўқ. Бир икки футболчи бор, Златан танийдиган. Қолганлари ўта паст даража. Таъбир жоиз бўлса ҳам айтамиз, Ибра қайтгандаги "Милан"га ўхшаш. Жуда ўхшаш. Ҳозирда" россенери" чемпионлик учун курашяпти ва кўпгина йигитлари ном чиқариб қўйди. Златаннинг шарофати билан, албатта.

Ўйлашимча, Швецияга ҳам ўша эксперементни ишлатишяпти. Ўхшаб кетса даҳшат бўладия: Швеция миллий жамоаси Европа чемпионлигига даъвогарлик қилиб қолса...

Златан яна хотиржам айтса керак: "Нима қилай футбол Бенжамин Баттони бўлсам..."

Хайрулла ҲАМИДОВ.