«Манчестер Юнайтед» «Вест Хэм» ярим ҳимоячиси Деклан Райс трансферига Жесси Лингардни ҳам қўшиш вариантини ўрганиб чиқмоқда, дея хабар берди The Athletic.
Манкунианликлар устози Оле-Гуннар Сульшернинг шахсан ўзи англиялик таянч ярим ҳимоячининг хизматларига қизиқмоқда. Райсни Неманья Матичга узоқ муддатли ўринбосар сифатида кўришаётгани ойдинлашди.
Эҳтимолий трансфернинг бир қисмига айланиши мумкин бўлган ва ҳозирда «болғачилар» сафида ижарада ўйнаётган Лингард АПЛнинг 8 ўйинида 6 гол уришга муваффақ бўлди. Мазкур ҳолат музокара жараёнини енгил ўтишини таъминлаб бериши мумкин.
Англия терма жамоасида 15 ўйин ўтказган Райс жорий мавсум лондонликлар таркибида АПЛнинг 29 баҳсида майдонга тушиб, биттадан гол ва ассистни ўз ҳисобига ёздириб қўйган.
