«Челси» бош мураббийи Томас Тухель Европа Чемпионлар Лигаси чорак финал жавоб баҳси доирасида «Порту»га қарши кечган ўйиндан (0:1) кейин ўз фикрларини билдириб ўтди.

Лондонликлар ушбу учрашувда 0:1 ҳисобида ютқазганига қарамай, дастлабки ўйиндаги ғалаба эвазига (2:0) ярим финалга чиқди.

"Барча чораларни кўрдик. Қийин ўйин бўлди. Балки, бу телевизорда кўриш учун жуда томошабоп ўйин бўлмагандир, бироқ майдон ёнидан жуда асабий ва тезкор ўтгани кўриниб турди. «Порту»га қарши ҳаракат қилиш ва уларнинг босимига дош бериш жуда қийин бўлди.

Биз жуда яхши ҳимояландик, қуруқ ўйин ўтказишга ҳақли эдик. Яхши имкониятлар бўлди, лекин гол ура олмадик. Умуман олганда ортда қолган 180 дақиқани инобатга олсак, биз ғалабага ҳақли эдик.

Кейинги босқичдаги рақибни танламоқчи эмасман, бироқ Чемпионлар Лигасида ўз лигамиз жамоаси билан ўйнашни хоҳламаган бўлардим. Рақиблар ўйинига қадар ҳали вақт бор. Уни томоша қиламан, шуниси ёқимлики, уни ярим финалчи сифатида кузатаман. Бу жуфтликда ҳар нарса бўлиши мумкин, «Ливерпуль» ўз майдонида жуда кучли. Биз эса қайси рақиб тушса ҳам уни қабул қиламиз", — деди Томас Тухель.

«Ливерпуль» — «Реал» учрашуви Тошкент вақти билан 14 апрелдан 15 апрелга ўтар кечаси 00:00 да бошланади. Ушбу жамоалар ўртасидаги дастлабки ўйинда мадридликлар 3:1 ҳисобидаги ғалабани қўлга киритганди.