Ўзбекистон чемпиони ҳисобланган "Бунёдкор" "Dubai Matchworld Cup-2012" мусобақасини мағлубият билан бошлади.
Учрашувга ҳар иккала жамоа асосий таркиби билан майдонга тушди. Биринчи бўлим тўлиқ Россия клуби устунлиги остида ва бу таблода ҳам ўз аксини топди. 13-дақиқада Кришитонинг чап қанотдан узатган ҳаволатмасидан сўнг Саболч Хусти, бош билан йўллаган зарбаси орқали, Нестеров дарвозасини аниқ нишонга олди. Бу вазиятда "Бунёдкор" ҳимоячилари "Зенит" ярим ҳимоячисини қаровсиз қолдиришганди. 42-дақиқага келиб, бурчак тўпи амалга оширилганидан сўнг, Александр Бухаров ҳисобдаги фарқни иккитага оширди.
"Бунёдкор" иккинчи бўлимда ҳисобни қисқартиришга муваффақ бўлди. Захирадан майдонга тушган Баҳодир Пардаевнинг тўп узатишидан сўнг ҳужумчи Камолиддин Мурзоев рақиб ҳимоячисини чалғитиб, "Зенит" дарвозасини ишғол этишга муваффақ бўлди.
Ушбу ҳисоб ўйин якунига қадар ўзгармади. "Зенит" 2:1 ҳисобида "Бунёдкор"ни мағлубиятга учратди.
Мусобақа тақвимига кўра, "Бунёдкор" мусобақадаги иккинчи учрашувни 20 январь куни Швейцариянинг "Ксамакс" клубига қарши ўтказиши керак. "Зенит" эса мусобақада танловдан ташқари иштирок этаётан Ироқ олимпия терма жамоасига қарши майдонга тушади.
Мусобақанинг "В" гуруҳида Ўзбекистон терма жамоаси ҳам иштирок этмоқда. Вадим Абрамов шогирдлари мусобақадаги илк учрашувни 19 январь куни Тошкент вақти билан 18:00да "Шахтёр"га қарши ўтказади.
ЗЕНИТ - БУНЁДКОР 2:1 (2:0)
Голлар: Хусти (13), Бухаров (42) - Мурзоев (83).
БУНЁДКОР: Игнатий Нестеров, Акмал Шораҳмедов (Орифжон Мамажонов, 82), Дэвид Ония (Артис Лазгинс, 60), Артём Филипосян, Анвар Ғофуров (Жавлон Мирабдуллаев, 73), Анвар Ражабов (Баҳодир Пардаев, 60), Шавкат Саломов (Яннис Манзукас, 78), Лутфулла Тўраев (Муҳаммад Юсуф Машриқий, 66), Славолюб Жоржевич (Хайрулла Каримов, 46), Данило Белич (Камолиддин Мурзоев, 46), Виктор Карпенко (Илҳом Бойдедаев, 78).
