Англия клублари Европа суперлигасидан чиқиб кетганидан сўнг ташкилот матбуот хизмати расмий баёнот берди.

«Европа суперлигаси қитъадаги футболни ўзгартириш келганига ишонч ҳосил қилди.

Ҳозирги тизим ишламаётгани учун янги турнир ташкил қилишни таклиф қиламиз. Бизнинг таклифимиз мазкур спорт турининг ривожланишига қаратилган эди. Бунда пандемия туфайли қийин аҳволга тушиб қолган футбол пирамидасининг ривожланишига барқарорлик бермоқчи эдик. Шу билан бирга футбол гуруҳларининг даромади ошган бўларди.

Англия клублари босим остида Суперлигани тарк этган бўлса-да, бизнинг таклифимиз қонунларга, Европа нормаларига тўла мос келарди. Буни суд қарори ҳам исботлади.

Юзага келган вазиятни инобатга олган ҳолда лойиҳани қайта ташкил қилиш учун керакли чораларни кўрамиз. Биз ўз мақсадимиздан воз кечмаймиз. Чунки, мақсадимиз мухлисларга яхши тажриба ва футбол жамоатчилигига катта даромад тақдим этишдан иборат», – дейилади баёнотда.

Эслатиб ўтамиз, қитъанинг 12та топ-клуби — «Манчестер Юнайтед», «Манчестер Сити», «Ливерпуль», «Челси», «Арсенал», «Тоттенхэм», «Барселона», «Реал», «Атлетико», «Ювентус», «Интер» ва «Милан» янги Суперлигани ташкил этиш ҳақида баёнот беришган эди.