Angliya klublari Yevropa superligasidan chiqib ketganidan so‘ng tashkilot matbuot xizmati rasmiy bayonot berdi.

«Evropa superligasi qit’adagi futbolni o‘zgartirish kelganiga ishonch hosil qildi.

Hozirgi tizim ishlamayotgani uchun yangi turnir tashkil qilishni taklif qilamiz. Bizning taklifimiz mazkur sport turining rivojlanishiga qaratilgan edi. Bunda pandemiya tufayli qiyin ahvolga tushib qolgan futbol piramidasining rivojlanishiga barqarorlik bermoqchi edik. Shu bilan birga futbol guruhlarining daromadi oshgan bo‘lardi.

Angliya klublari bosim ostida Superligani tark etgan bo‘lsa-da, bizning taklifimiz qonunlarga, Yevropa normalariga to‘la mos kelardi. Buni sud qarori ham isbotladi.

Yuzaga kelgan vaziyatni inobatga olgan holda loyihani qayta tashkil qilish uchun kerakli choralarni ko‘ramiz. Biz o‘z maqsadimizdan voz kechmaymiz. Chunki, maqsadimiz muxlislarga yaxshi tajriba va futbol jamoatchiligiga katta daromad taqdim etishdan iborat», – deyiladi bayonotda.

Eslatib o‘tamiz, qit’aning 12ta top-klubi — «Manchester Yunayted», «Manchester Siti», «Liverpul», «Chelsi», «Arsenal», «Tottenxem», «Barselona», «Real», «Atletiko», «Yuventus», «Inter» va «Milan» yangi Superligani tashkil etish haqida bayonot berishgan edi.