Афсонавий Паоло Мальдини "Милан"га қайтиш нияти борлигини яширмаяпти. Жамоада 24 йил давомида тўп сурган 43 ёшли Мальдининг айтишича, жонажон клубида ишлаш бўйича ҳали таклиф бўлмаган.
"Сильвио Берлускони ўз баёнотлари вақтида, худди Барбара Берлускони каби, бир неча бор менинг исмимни тилга олди. Аммо ҳали ҳеч ким таклиф билан чиққани йўқ. Леонардо мени жамоага яқинроқ бўлишимни хоҳлаган бўлса, Массимилиано Аллегри футбочилар ва клуб ўртасидаги воситачи сифатида кўрмоқчи эди", деди Мальдини.
"Собиқ жамоадошларимнинг аксарияти мени Миланеллода кўришни хоҳлайди. Аммо ҳар сафар клуб эшиги мен учун ёпиқ. Нима учун бундай қарор қабул қилинганини ҳақиқатан ҳам билмайман. Менга маълум бўлгани - Адриано Галлиани ва Паоло Мальдинининг бир жойда бўлмаслиги учун ҳеч қандай сабаб йўқ. Яна ҳам ким билади, мен Галлианининг ўрнига фикр билдира олмайман", деди "Мила"нинг афсонавий футболчиси.
"Милан" ҳар вақт менинг юрагимда ва унга фойдам тегишини истайман. Ягона талаб - ғояларимни амалга ошириш учун имконият беринг. Мен "Милан"га фақат яхши бўлишини хоҳлайман ва, афтидан, бу ким учундир муаммо туғдираяпти, шекилли. Мен, бу нарса низога сабаб бўлса ҳам, ҳаммасини очиқ айтишдан қўрқмайман", деди "Милан"нинг собиқ сардори.
"Айни вақтда, бир нарсани таъкидлаб ўтишни хоҳлардим: менга клубдан қандайдир катта лавозим беришларини сўраётганим йўқ. Клубда 40 йилдан бери ишлаб келаётган одамларга нимадир ўргатиш ниятим йўқ. Шунчаки, мен "Милан"га миннатдорчилик билдиришни истайман", дея қўшимча қилди Паоло Мальдини.
Паоло Мальдини 1985-2009 йиллар давомида "Милан" таркибида 647 ўйинда майдонга тушиб, 29 та гол урган. Италия терма жамоасидаги фаолиятини 1988 йилда бошлаган футболчи 2002 йилга қадар 126 учрашувда майдонга тушиб, еттита гол муаллифига айланган.